من مدونة نوارة نجم عن فيلم حين ميسرة

14 يناير, 2008

حين مسخرة

انا مش ح اتكلم عن ان فيلم حين ميسرة بيتاجر بآلام الناس الحقيقية من غير ما يتعاطف معاهم ولا ثانية لدرجة انه في نهاية الفيلم بيفجرهم هم والحكومة اللي عملتهم

ولا ح اتكلم عن اني زهقت بقى من افلام "عايز يبين لك من خلال" اللي خالد يوسف مغرم بيها: الناس تعمل موعظة اسلامية موعظة مسيحية موعظة بوذية

عمري ما شفت واحد بيعمل موعظة ناصرية

وانا ما باحبش حد "يبين لي من خلال" يا اما يبين لي على طول زي الافلام الدينية بتاعة نحن غرابة عت عت يا اما يسيبني اتفرج

ولا ح اتكلم عن كم احداث الخيال العلمي اللي مبني عليها السيناريو زي ان اسرة من طبقة فوق المتوسطة تتبنى طفل وتربيه سبع سنين ولما امه بالتبني تبقى حامل جوزها يقول لها ارمي بقى العيل ده ما جالنا عيل اصلي فيتحول الولد الى طفل شوارع!!!! يعني فيه ستميت طريقة يتحول بيها الاطفال لاطفال شوارع غير التسلسل غير المنطقي وغير المعقول ده

ولا ليا دعوة بمشاهد السحاق ولا الجنس غير المبررة لسببين: اولا لان اللي بيعملوها ناس كبار وبالغين وفاهمين هم بيعملوا ايه

ثانيا لان اللي بيتفرج برضه المفروض انه بني ادم كبير وناضج ويا اما يدور وشه زي ما انا عملت يا اما ما يدخلش الفيلم من اساسه يا اما يتفرج وهو حر بقى ده بني ادم كبير وعاقل

انا اللي يهمني مشاهد الجنس بين الاطفال اللي قدمها لنا خالد يوسف من غير ادنى رحمة ولا شفقة ولا التزام بالاعلان العالمي لحقوق الطفل

معلش مع احترامي الكامل ومراعاتي لزوار المدونة لكن انا مضطرة اطرح عليهم سؤال يحمل بعض التفاصيل اللي قد تضايقهم

لو عندك ابن او بنت او اخ او اخت صغيرين ما يزدش عمرهم عن تلاتاشر اربعتاشر سنة بالكتير

ولقيت بنتك او ابنك بيتصوروا وهم عريانين ونايمين مع بعض وعليهم ملاية والطفلة بتقول للطفل: حلو يا ايمن حلو قوي يا ايمن ده انت بقيت جامد قوي....ممكن اعرف شعورك ايه؟

الطفلة والطفل اللي اتصوروا بالمنظر ده مالهمش اب؟ مالهمش ام؟ مالهمش ده كله؟ يبقى لهم رب

حد فيكوا يرضاها على ولاده او اخواته الصغيرين او حتى ولاد الجيران اللي كبروا قدامه؟

اذا كان اطفال الشوارع، نتيجة لانتهاك الكبار لهم جنسيا، فعلا بيمارسوا الجنس والشذوذ كمان مع بعض في الشارع، هل مهمتنا دلوقت اننا نعالج او على الاقل ننبه للأمر وللا مهمتنا اننا نصورهم في الاوضاع دي؟

ما المخرجة تهاني راشد والمخرج احمد عاطف عملوا افلام عن اطفال الشوارع، واتكلموا عن كل حاجة، بس بحب

وبرحمة

باحساس ان العيال دول ولادهم او اخواتهم الصغيرين

ورغم انهم عرضوا كل المشاكل الا انهم ما تاجروش بيهم ولا صوروهم في اوضاع يكرهوها لولادهم او اخواتهم الصغيرين

انا ما يهمنيش اذا كان الطفلين دول لهم اب وام والاب والام وافقوا على المسخرة دي

لان في الحالة دي الاب والام لازم يتقدموا للمحاكمة بتهمة الموافقة على اساءة استغلال اطفالهم جنسيا وعلى مرآى ومسمع من الناس

واذا كان خالد فعلا جاب اطفال شوارع فبرضه مش من حقه يصورهم بالشكل ده

اذا ما كانش قادر يساعدهم

اذا ما كانش قادر يحبهم زي ولاده او اخواته الصغيرين

اذا ما كانش فعلا عايز ينبه المجتمع لاوضاعهم السيئة

يبقى على الاقل يسيبهم في حالهم

ما يكرهش الناس فيهم

ما يستغلهمش ويتاجر بيهم عشان يغازل مزاج الشواذ من الناس

انا فوجئت بالمشهد ده وقعدت اعيط

مش من التأثر من الفيلم

ولكن انا تخيلت ان اختي الصغيرة اللي عندها خمستاشر سنة ونص مكان البنت دي....بعد شر عليها الف بعد الشر

حرااااااااااااااااااام عليك يا اخي

حرام عليك

يا سيد خالد السينما مش مجال لتنفيس كراهيتك لناس بتحتقرهم

ولا مجال لوعظ الناس وسقيهم الناصرية بالدراع وبالعافية

ولا مجال للتنفيس عن خيالك العلمي يا باشمهندس..مافيش اي حدث مبرر في الفيلم مع ان التبريرات اسهل من كده مافيش

العيل كان ممكن يبقى طفل شارع عشان امه سابته في الاتوبيس واخدوه ودوه مؤسسة رعاية احداث وكانوا بيعذبوه هناك فهرب مثلا

مش مثلا ما هو ده اللي بيحصل

لكن مين اسرة محترمة وللا غير محترمة ح تربي طفل سبع سنين وترميه والله لو كانوا فاتحين بيت دعارة ما يهون عليهم العيل

والله لو كان قطة ما يهون عليهم يرموه في الشارع

ثم ايه اللي يخلي البت تروح تاني للست الشاذة؟ ما تشتغل خدامة يا اخي...ما تلف على العمارات وتقول لهم عايزين واحدة تمسح لكوا السلم؟ زي ما بيحصل على طول...وللا انت بقى ساكن في حتة شيك والاشكال دي مش بتعدي على عمارتكوا طبعا

ومين ده اللي ساكن في العشوائيات وبيغني اغاني وطنية شبه اغاني وجيه عزيز؟

ومين الارهابيين دول اللي موجودين في العشوائيات لابسين لبسهم وعايشين حياتهم وبيتعاطوا مخدرات زيهم عشان يستخبوا فيهم ومش ممكن ابدا تفرقهم من ابناء العشوائيات

ايه شغل الامن ده يا باشمهندس انت بتبلغ عن سكان العشوائيات عشان الحكومة تموتهم كلهم بما ان كلهم ارهابيين؟

ثم مين ست في الدنيا تقول انا جدوري هنا ومش ح اخرج من هنا الا على القبر؟ ايه الوطن في العشوائيات؟ هو انت مش عارف تفرق ما بين السيدة زينب والحسين وامبابة وما بين العشوائيات؟

وبعدين يعني اذا كان فعلا اهل العشوائيات بيقولوا ح نخرج من هنا على القبر زي ما انت مطلعهم في الفيلم يبقى مافيش داعي لحل مشكلة العشوائيات صح؟ سيبوهم بقى عايشين هناك ما هم مبسوطين!! انت لو عشت العيشة دي ح تبقى مبسوط؟

طيب تاني ح اعيد عليك...دي ناس زيك زيهم بالظبط، مش مبسوطين ولا حاجة ولا عايزين يفضلوا في العشوائيات

ولا الحل فيهم انهم يتفجروا هم والحكومة اللي عملتهم

وللا انت عايز البلد تفضى عليك مثلا؟

السؤال الاخير بقى

ممكن افهم ايه اللي يخلي حين ميسرة فيلم هادف واللمبي فيلم ساقط؟ يعني الواحد لازم يبقى دمه تقيل عشان يبقى هادف؟

وللا هو عشان حاشر عبد الناصر في كل حاجة؟ والله ده من بخت عبد الناصر الاسود....انا لو مكان عياله كنت رفعت قضية على خالد يوسف بتهمة انه بيكره الناس في ابوهم

مرسلة بواسطة جبهة التهييس الشعبية في 04:10 م 16 التعليقات ة